ស្នើសុំ​កម្ចី នៅគ្រប់​ទីកន្លែង និង​គ្រប់​ពេលវេលា​ជាមួយ​កម្មវិធី​ម៉ូបាល​អនឡាញ អ៉ីអន​ រហ័ស

ជាមួយ​បទពិសោធន៍​ថ្មី​នៃភាព សាមញ្ញ រហ័ស និង​ងាយស្រួល របស់​កម្មវិធី អ៉ីអន​ រហ័ស ដោយ​អតិថិជន​មិន​ចាំបាច់​មក​កាន់​សាខា​ដោយ​ផ្ទាល់​នោះ​ទេ អតិថិជន​អាច​ស្នើសុំ​កម្ចី​ជា​សាច់ប្រាក់​នៅ​គ្រប់​ទីកន្លែង គ្រប់​ពេលវេលា និង​ទទួល​បាន​ព័ត៌មាន​ដែល​មាន​អត្ថប្រយោជន៍​ជាច្រើន​ទៀត​ពី​កម្មវិធី​ម៉ូបាល​របស់យើង។

ទាញយក និងចុះឈ្មោះ​ប្រើប្រាស់​កម្មវិធី អ៉ីអន រហ័ស ម៉ូបាលឥឡូវនេះ!

មុខងារកម្មវិធី អ៉ីអន រហ័ស ម៉ូបាល៖

លក្ខខណ្ឌនៃការប្រើប្រាស់

លក្ខខណ្ឌនៃការប្រើប្រាស់នេះ (“លក្ខខណ្ឌ”) គឺជាឯកសារ​គតិយុត្តិ​មួយ​ដែលបង្ហាញ​អំពីសិទ្ធិ និងកាតព្វកិច្ច​របស់​អ្នកប្រើប្រាស់​កម្មវិធី AEON ROHAS ដែល​ដាក់ឲ្យ​ដំណើការ​ដោយ ធនាគារឯកទេស អ៉ីអន (ខេមបូឌា) ភីអិលស៊ី (“ធនាគារ”) ។ ការប្រើពាក្យ “អ្នក” និង “របស់អ្នក” គឺសំដៅទៅលើ អ្នក ដែលបានយល់ព្រម​នៅក្នុង​ការចុះកិច្ចព្រមព្រៀងនេះ។

១. លក្ខខណ្ឌនៃការទទួលស្គាល់

១.១. កម្មវិធី AEON ROHAS (“App”) គឺជាសេវាកម្ម​អនឡាញ​ដែលផ្ដល់ជូន​ដោយ​ធនាគារ។ ការចូលទៅប្រើប្រាស់ ឬប្រើប្រាស់ គេហទំព័រ​ណាមួយ ដែល​ផ្តល់​តំណភ្ជាប់​ទៅក្នុង App ការចុះឈ្មោះ​បង្កើត​គណនី ការចូលគណនី ឬប្រើប្រាស់នូវ ទម្រង់ ព័ត៌មាន សេវាកម្ម មុខងារ ឬអ្វីក៏ដោយ​ដែលមាននៅក្នុង App (ជារួម​តទៅ​ហៅថា “សេវាកម្ម”) ការចុច​លើប៊ូតុង ឬការធ្វើសកម្មភាព​ណាមួយ​ដែល​បញ្ជាក់​ពីការយល់ព្រម​លើលក្ខខណ្ឌ​នោះ​គឺមានន័យថា (១) អ្នកបានយល់ព្រម​ចងនូវ​កាតព្វកិច្ច​ជាមួយ​នឹង​លក្ខខណ្ឌ និងការកែប្រែ ឬការបន្ថែម​ណាមួយ​នៅថ្ងៃអនាគត​នៃលក្ខខណ្ឌ​ដែលត្រូវបាន​ដាក់ឲ្យ​ប្រើប្រាស់​ជាសាធារណៈ​តាមរយៈ​សេវាកម្ម​នេះ (២) បញ្ជាក់ថា​អ្នកជាបុគ្គល​ដែលមាន​អាយុ​តាមច្បាប់​របស់​ប្រទេសអ្នក ថាអ្នក​អាចធ្វើការសម្រេចចិត្ត​ដោយខ្លួនឯង​ក្នុងការចុះកិច្ចព្រមព្រៀង​នេះ និង (៣) បញ្ជាក់ថា អ្នក​គឺមាន​សមត្ថភាព​គ្រប់គ្រាន់​ក្នុងការចុះកិច្ចព្រមព្រៀង​នេះដោយ​ខ្លួនឯង។

១.២. ប្រសិនបើ​អ្នកមិនព្រម​ចំពោះ​លក្ខខណ្ឌនេះ អ្នកមិនត្រូវចូល ឬប្រើប្រាស់សេវាកម្មនេះទេ។

១.៣. សូមបញ្ជាក់ផងដែរថា នឹងមាននូវ​លក្ខខណ្ឌ និងខចែង ផ្សេងទៀត​ដែលកំណត់ជាក់លាក់​ទាក់ទង​ទៅនឹង​សេវាកម្ម​របស់យើង ដែល​អ្នកបាន​ស្នើសុំ ហើយ​តម្រូវឲ្យ​មានការយល់ព្រម​ពីអ្នកជាមុន។ លក្ខខណ្ឌ និងខចែង​ទាំងនោះ នឹង​មានសុពលភាព​ចាប់ពី​ថ្ងៃដែលអ្នក​បានយល់ព្រម​ដាច់ដោយឡែក​ពីគ្នា។ ក្នុងករណីដែល លក្ខខណ្ឌ ដែលមាននៅទីនេះ និងលក្ខខណ្ឌ និងខចែង​ទាំងនោះ​មានភាពមិនស្របគ្នា នោះលក្ខខណ្ឌ និងខចែង​ទាំងនោះ​ត្រូវបាន​យកមក​អនុវត្ត។

១.៤. អ្នកបានទទួលស្គាល់ថា សេវាកម្ម​ដែលត្រូវផ្ដល់ជូន មានដូច​រៀបរាប់​ខាងក្រោម៖

• ស្នើសុំកម្ចីឥណទានបុគ្គល និងសេវាកម្ម​បង់រំលស់​ជាមួយ​ធនាគារ
• ផ្តល់ការយល់ព្រម​ដល់​ធនាគារ​ទៅតាម​ការតម្រូវ​ដែលច្បាប់ និង​បទប្បញ្ញាតិ្ត​កំណត់
• ពិនិត្យមើលនូវលទ្ធផល​នៃការស្នើសុំតាមរយៈ App
• បង្កើត​នូវ​កិច្ចព្រមព្រៀង​បន្ទាប់​ពីកម្ចី​ត្រូវបាន​អនុម័ត​ដោយ​ធនាគារ

២. ការចុះឈ្មោះប្រើប្រាស់

២.១. អ្នកនឹងក្លាយជា​អ្នកប្រើប្រាស់​សេវាកម្ម (“អ្នកប្រើប្រាស់”) តាមរយៈ​ការបំពេញ​នូវការចុះឈ្មោះ​បង្កើត​គណនីមួយ (“គណនី”)។

លក្ខខណ្ឌ នឹងមានសុពលភាព នៅពេល​ដែល​អ្នកបានបង្ហាញ​ពីការយល់ព្រម​របស់​អ្នក ទៅលើ លក្ខខណ្ឌ នោះ។ អ្នក នឹង​មិនអាចក្លាយជា​អ្នកប្រើប្រាស់​បាននោះទេ ប្រសិនបើអ្នកមាន​អាយុក្រោម ១៨ឆ្នាំ ហើយមិនមាន​សញ្ជាតិខ្មែរ។ សេវាកម្ម​ទាំងនេះ គឺមិនត្រូវបាន​ផ្ដល់ជូន​សម្រាប់អនីតិជន អ្នកគ្មានសញ្ជាតិខ្មែរ ហើយធនាគារ នឹងមិនធានារាល់ព័ត៌មាន​ដែលទទួលបាន​ពីអ្នកផ្ដល់​ព័ត៌មានថា​ពិតប្រាកដ​នោះទេ។

២.២. នៅពេល​ចុះឈ្មោះ​បង្កើតគណនី អ្នកយល់ព្រមថា នឹងផ្ដល់ជូន​នូវព័ត៌មាន​ដែលត្រឹមត្រូវ ជាក់លាក់ មានបច្ចុប្បន្នភាព និងពេញលេញ ក្នុងការបំពេញទម្រង់នៃពាក្យស្នើសុំ (“ទិន្នន័យចុះឈ្មោះ”) ហើយអ្នក​ក៏យល់ព្រម​ក្នុងការធ្វើបច្ចុប្បន្នភាព​នូវទិន្នន័យ​ចុះឈ្មោះ​នៅពេលចាំបាច់។ ទិន្នន័យ​ចុះឈ្មោះ​គឺរួមបញ្ចូលនូវ​ព័ត៌មាន​បញ្ជាក់​អត្តសញ្ញាណ​ផ្ទាល់ខ្លួន​របស់អ្នក​ដូចជា ឈ្មោះពេញ ថ្ងៃខែឆ្នាំកំណើត ភេទ សញ្ជាតិ អាសយដ្ឋាន និងលេខទូរស័ព្ទរបស់អ្នក។

២.៣. នៅពេលដែល​ការចុះឈ្មោះ​បានបំពេញ​ចប់សព្វគ្រប់ នោះការបញ្ជាក់​ដោយលេខកូដ (OTP) នឹងផ្ញើទៅ​លេខទូរស័ព្ទ​របស់អ្នក​ដើម្បី​ផ្ទៀងផ្ទាត់ និងទទួលការបញ្ជាក់ពីអ្នក។

២.៤. ការដាក់ស្នើ​នូវទិន្នន័យ​ចុះឈ្មោះ​ដើម្បីប្រើប្រាស់​សេវាកម្ម គឺត្រូវស្ថិតនៅក្រោម​ គោលការណ៍​ឯកជនភាព​របស់ ធនាគារ (“គោលការណ៍ឯកជនភាព”) ដែលតម្រូវឲ្យ​អ្នកត្រូវអានមុន នឹងប្រើប្រាស់សេវាកម្ម។

៣. ដែនកំណត់នៃសេវាកម្ម

៣.១. ការភ្ជាប់បណ្តាញ​ដើម្បី​ប្រើប្រាស់​សេវាកម្ម៖ ធនាគារ នឹងមិនទទួលខុសត្រូវ​ចំពោះ​ដំណើការ​មិនពេញលេញ ការមិនអាចប្រើប្រាស់បាន ការរំខាន ការផ្អាក ឬការពន្យារនូវ សេវាកម្ម (រួមបញ្ចូលលទាំង ការបញ្ជូន​នូវការរំលឹក ឬការជូនដំណឹង ឬវិក្កយបត្រ ឬប្រតិបត្តិការ ឬការណែនាំនានា) ដោយកត្តា​ផ្សេងៗ ដែលមិនស្ថិតនៅក្រោម​ការគ្រប់គ្រងរបស់ ធនាគារ នោះទេ។

៣.២. តំហែទាំប្រព័ន្ធ៖

៣.២.១. ធនាគារ នឹងបន្ថែម ឬផ្អាកនូវដំណើការមុខងារណាមួយ ឬផ្អាកនូវដំណើការនៃសេវាកម្ម ឬសេវាផ្សេងៗគ្រប់ពេលវេលា៖

• • ប្រសិនបើ ធនាគារ​យល់ឃើញថា មានការគំរាមកំហែង​ទៅលើ​សេវាកម្ម​ណាមួយ​លើប្រព័ន្ធ ឬផ្នែកណាមួយ​នៃប្រព័ន្ធ ឬ
  • ក្នុងគោលដៅ​ដើម្បី​តំហែទាំ​តាមកាលកំណត់ និងការងាររដ្ឋបាល។

៣.២.២. App គឺជាកម្មវិធី​តម្រូវឲ្យ​ធ្វើការអភិវឌ្ឍ​ជាបន្តបន្ទាប់ ដែលនឹង​អាចដាក់ចេញឲ្យ​ប្រើប្រាស់​ជាញឹកញាប់​ឡើងវិញ ដើម្បីផ្ដល់ជូននូវ​មុខងារថ្មីៗ និងការធ្វើបច្ចុប្បន្នភាព​នៃដំណើរការប្រព័ន្ធ។ អ្នកត្រូវតែ​ធ្វើបច្ចុប្បន្នភាព និងប្រើប្រាស់ App ដែលបានធ្វើបច្ចុប្បន្នភាព​ចុងក្រោយបំផុត។

៣.២.៣. ពីពេលមួយ​ទៅពេលមួយ ធនាគារ នឹងតម្រូវឲ្យ​អ្នកប្រើប្រាស់ ធ្វើបច្ចុប្បន្នភាព App ដើម្បីរក្សា​សុវត្ថិភាព និងសមត្ថភាព​បំពេញសេវាកម្ម​ដល់អ្នកប្រើប្រាស់។ អ្នកនឹងមិនអាច​ប្រើប្រាស់ App ចាស់បានទៀតទេ ប្រសិនបើ​អ្នកមិនបាន​ធ្វើបច្ចុប្បន្នភាពថ្មី។

៤. វិធានប្រុងប្រយ័ត្នទូទៅ

៤.១. អ្នកត្រូវទទួលខុសត្រូវ​ចំពោះ​ការប្រើប្រាស់ និងការពារ​មិនឲ្យ​មានការចូលប្រើប្រាស់​ដោយគ្មានការ​អនុញ្ញាតពីអ្នក និង​ការចូលទៅក្នុង App តាមរយៈ​ទូរស័ព្ទដៃ​របស់អ្នក និង/ឬ ឧបករណ៍​ផ្សេងទៀត ព្រមទាំង​ត្រូវថែរក្សា​ព័ត៌មានផ្ទាល់ខ្លួន​របស់អ្នក និងព័ត៌មាន​បញ្ជាក់ពីសុវត្ថិភាព​ផ្សេងទៀត​គ្រប់ពេល ដោយរួមបញ្ចូល និងមិនកំណត់​ដូចខាងក្រោម៖

• មិនត្រូវអនុញ្ញាតឲ្យ​អ្នកផ្សេង​ប្រើប្រាស់នូវ​ព័ត៌មាន​បញ្ជាក់ពី​សុវត្ថិភាព ដើម្បីចូលទៅក្នុង​គណនី ឬចូលក្នុង App តាមរយៈ​ទូរស័ព្ទដៃ និងឧបករណ៍​ផ្សេងទៀតឡើយ។
• មិនត្រូវអនុញ្ញាតឲ្យ​អ្នកផ្សេង​ដោះសោរ​ចូលក្នុង​ទូរស័ព្ទដៃ និងឧបករណ៍ផ្សេងទៀត​របស់អ្នក​ឡើយ។
• មិនត្រូវទុក​ទូរស័ព្ទដៃ​របស់អ្នក​ចោលឡើយ ប្រសិនបើ​អ្នកនៅបើក​ប្រើប្រាស់​គណនី ឬ App ក្នុងទូរស័ព្ទដៃ​របស់អ្នក។
• ត្រូវធានាថា​រាល់ព័ត៌មាន​បញ្ជាក់ពី​សុវត្ថិភាព គឺដឹងតែ​អ្នកម្នាក់ឯង​គត់ ហើយអ្នកត្រូវ​ទទួលខុសត្រូវ​នៅពេល​អ្នកបានប្រាប់វា​ទៅអ្នកផ្សេង ទោះក្នុងហេតុផល​ណាក៏ដោយ។
• មិនត្រូវប្រាប់​ព័ត៌មាន​បញ្ជាក់ពី​សុវត្ថិភាព​របស់អ្នក​ ទៅអ្នកផ្សេង​ឡើយ (រួមទាំង ប៉ូលីស បុគ្គលិក​ធនាគារ ឬមនុស្សជាទី​ស្រឡាញ់​របស់អ្នក) និង/ឬ
• ត្រូវធានាថា​មិនមាន​អ្នកណា​ម្នាក់បានឃើញ​ពេលអ្នកវាយបញ្ចូល​នូវ​ព័ត៌មាន​បញ្ជាក់ពី​សុវត្ថិភាពនោះឡើយ។

៤.២. អ្នកត្រូវចាក់សោរ​ទូរស័ព្ទដៃ​របស់អ្នក ឬប្រើវិធី​ណាមួយ​ផ្សេងទៀត​ដើម្បី​ការពារ​ការចូលទៅប្រើប្រាស់ App ដោយគ្មានការអនុញ្ញាត។

៤.៣. អ្នកត្រូវតែ​ជូនដំណឹង​ភ្លាមទៅ​ធនាគារ​តាមរយៈ​ទូរស័ព្ទលេខ ០២៣/០៧០/០៧៨ ៩៨៨ ៥៥៥ នៅពេលដែលអ្នកដឹងថា៖

• ទូរស័ព្ទដៃ​របស់អ្នក​ត្រូវបាន​គេលួច ឬបាត់បង់
• ឈ្មោះចូលប្រើប្រាស់ និងលេខសម្ងាត់ ត្រូវបានគេដឹង ឬសង្ស័យថា​មានគេដឹង
• មានអ្នកផ្សេង​អាចចូលទៅក្នុង​ឧបករណ៍ ក្នុងទូរស័ព្ទដៃ​របស់អ្នក
• មានអ្នកផ្សេង​បានចូលទៅ​ប្រើប្រាស់​គណនី​របស់អ្នក​តាមរយៈ App
• អ្នកសង្កេតឃើញថា មានការស្នើឲ្យ​មានការបញ្ជាក់​ការប្រើប្រាស់ជាថ្មី (គឺប្រហែលជាការចូលទៅ​ប្រើប្រាស់​ដំបូងនៅក្នុង App ត្រូវបាន​ព្យាយាម​ចូលប្រើប្រាស់​ដោយប្រើ ព័ត៌មានបញ្ជាក់ពី​សុវត្ថិភាព​នៅលើឧបករណ៍​ផ្សេងទៀត)។

៤.៤. អ្នកត្រូវតែ​តម្លើងនូវ​កម្មវិធី​ដែលត្រូវបាន​អនុញ្ញាត​ចំពោះ​ទូរស័ព្ទដៃ​របស់អ្នក ​និងមិនត្រូវប្រើ​កម្មវិធី​ដែលមិនមាន​ការអនុញ្ញាត (ឧទាហរណ៍ jailbreak or root)។

៤.៥. អ្នកត្រូវធ្វើ​បច្ចុប្បន្នភាព​ចំពោះប្រព័ន្ធ​ដំណើការ និងប្រព័ន្ធ​សុវត្ថិភាព​នៃទូរស័ព្ទដៃ​របស់អ្នក នៅពេលមាន​ការដាក់ចេញឲ្យ​ប្រើប្រាស់​ដោយអ្នកផលិត​ទូរស័ព្ទដៃរបស់អ្នក ឬដោយ អ្នកគ្រប់គ្រង​ប្រព័ន្ធ​ដំណើការ​កម្មវិធីទូរស័ព្ទ​របស់អ្នក។

៤.៦. ត្រូវលុប App នៅក្នុងទូរស័ព្ទដែ​របស់អ្នក មុនពេលលក់ ឬឲ្យទៅអ្នកផ្សេង​ប្រើប្រាស់។

៥. ព័ត៌មានបញ្ជាក់ពីសុវត្ថិភាព

៥.១. ការប្រើប្រាស់ App និងសេវាកម្មរ​បស់វា គឺតម្រូវឲ្យ​មាននូវ​ព័ត៌មាន​បញ្ជាក់ពី​សុវត្ថិភាព​ដែលរួមមាន​ដូចជា ឈ្មោះចូល​ប្រើប្រាស់ និង​លេខសម្ងាត់។

៥.២. នៅពេល​ចូលទៅ​ប្រើប្រាស់ក្នុង App លើកដំបូង​អ្នកត្រូវ​បង្កើតនូវ​ឈ្មោះចូលប្រើប្រាស់ និង លេខសម្ងាត់ ដែលតម្រូវឲ្យ​ប្រើវា​ដើម្បី​បញ្ជាក់ពី​ការចូលប្រើប្រាស់​គណនី​របស់អ្នកនៅក្នុង App។

៥.៣. អ្នកត្រូវធានាថា ពាក្យសម្ងាត់​របស់អ្នក​គឺមានសុវត្ថិភាព និង​មិនងាយ​ក្នុងការស្មានដឹង​ដូចខាងក្រោម៖

• ត្រូវមានអក្សរ
• ត្រូវមានអក្សរ ធំមួយតួ និងអក្សរតូចមួយតួ មានសញ្ញាមួយ និងយ៉ាងតិចត្រូវមាន ០៨ខ្ទង់
• មិនត្រូវប្រើ នូវនាមខ្លួន និងនាមត្រកូលរបស់អ្នក ជាចំណែកនៃពាក្យសម្ងាត់ឡើយ។

៥.៤. អ្នកត្រូវធានាថា លេខសម្ងាត់​គឺមាន​សុវត្ថិភាព និងមិនត្រូវ​ប្រើព័ត៌មាន​ដូចខាងក្រោម៖

• ថ្ងៃ ខែ និងឆ្នាំកំណើតរបស់អ្នក
• លេខតាមលំដាប់លំដោយ ឬងាយស្រួលស្មានដឹងដូចជា (១២៣ ឬ ៧៧៧៧)
• ដូចគ្នាជាមួយលេខទូរស័ព្ទរបស់អ្នក ឬងាយស្រួលស្មានដឹងផ្សេងទៀតដែលទាក់ទងជាមួយអ្នក

៦. ការជូនដំណឹង

៦.១. ការជូនដំណឹងដោយការផ្ញើសារ

• អ្នកយល់ព្រមថា នៅពេលចុះឈ្មោះប្រើប្រាស់ App ធនាគារ នឹងផ្ញើសារ ឬស្នើដើម្បីផ្ញើសារ ទៅក្នុងទូរស័ព្ទដៃរបស់អ្នក។
• ធនាគារ នឹងមិនទទួលខុសត្រូវ​ចំពោះការបាត់បង់ ឬការខូចខាត​ដែលកើតឡើង​ដោយសារ​អ្នកផ្សេង​បានដឹងនូវ​ការផ្ញើសារ​នោះដោយសារ​ការធ្វេសប្រហែស​របស់អ្នកឡើយ។

៦.២. ការជូនដំណឹងនៅក្នុង App

• អ្នកបានយល់ព្រម​ក្នុងការទទួលយកនូវ​ការរំលឹក ឬការជូនដំណឹង​សម្រាប់ប្រើប្រាស់​នូវសេវាកម្ម ឬការទំនាក់ទំនង ឬការជូនដំណឹង​របស់​ធនាគារ​នៅតាមរយៈ App ។

៧. កាតព្វកិច្ច និងការទទួលខុសត្រូវរបស់អ្នក

៧.១. អ្នកមិនត្រូវប្រើប្រាស់ App ឬ សេវាកម្ម ក្នុងគោលដៅ​ក្រៅពី​មាននៅក្នុង​ចំណុច ១.៤ ខាងលើឡើយ។

៧.២. អ្នកមិនត្រូវប្រើប្រាស់ App ឬ សេវាកម្ម សម្រាប់មុខរបរ​ដែលច្បាប់ហាមឃាត់។

៧.៣. អ្នកមិនត្រូវក្លែងបន្លំ ឬមានចេតនា​ទុច្ចរិត​ក្នុងការប្រើប្រាស់ App ឬ សេវាកម្មឡើយ។

៧.៤. អ្នកធានា និងទទួលស្គាល់ថា​រាល់ព័ត៌មាន​ដែលអ្នក​ផ្ដល់ជូន​តាមរយៈ App គឺពេញលេញ ត្រឹមត្រូវ និងមានបច្ចុប្បន្នភាព។

៧.៥. អ្នកមិនត្រូវផលិត​ឡើងវិញ ដោយប្រើ​ព័ត៌មាន​ដែលមាន ឬអាចរកបាន​នៅក្នុង App ឬផ្នែកណាមួយ​ឡើយ ពុំនោះទេ​អ្នកត្រូវ​ទទួលខុសត្រូវ​ចំពោះ​មុខច្បាប់។

៧.៦. អ្នកត្រូវទទួលខុសត្រូវ​ចំពោះការខូចខាត​របស់​ធនាគារ (រួមបញ្ចូលទាំង ផលវិបាកនៃ​ការខូចខាត) ដែលកើតឡើង​ដោយសារ​ការក្លែងបន្លំ ការធ្វេសប្រហែស ឬការបំពាន លក្ខខណ្ឌ។ អ្នកត្រូវទទួលខុសត្រូវ​ចំពោះការខូចខាត​របស់​ធនាគារ​ដែលកើត​ឡើងដោយសារ​តែការចូល​ដោយគ្មាន​ការអនុញ្ញាត ឬប្រើប្រាស់សេវា​ដែលមាន​នៅក្នុង App ដោយសារអ្នក មិនបានគោរពនូវ​លក្ខខណ្ឌ ។

៧.៧. អ្នកនឹង​មិនទទួលខុសត្រូវ​ចំពោះ​ការខូចខាត​ដែលកើតឡើង​ដោយសារ៖

• សកម្មភាព​ក្លែងបន្លំ ឬការធ្វេសប្រហែស​របស់​ធនាគារ
• កំហុស​ដែលកើតឡើង​ដោយសារការប្រើប្រាស់​ប្រព័ន្ធ ដែលជាផ្នែករបស់ App ដែលវាជាកំហុស​ជាក់ស្តែង ឬបណ្តាលឲ្យ​ អ្នកប្រព្រឹត្តិខុស ដោយការធ្វើតាមសារ ឬការជូនដំណឹង​ដែលអ្នកបាន​ទទួល នោះ។

៨. ការបដិសេធ

៨.១. ធនាគារ នឹងមិនតំណាង ឬធ្វើការធានា ឬចងលក្ខខណ្ឌ​ណាមួយ ការបញ្ជាក់ណាមួយ ឬបង្កប់ន័យណាមួយ ដែលមាននៅក្នុង App ឬសេវាកម្ម ដោយធានាពីភាពសមស្រប​នៃគោលបំណង​ណាមួយ ឬការធានាណាមួយ ដែលកើតចេញ​ពីការធ្វើពាណិជ្ជកម្ម ការធ្វើជំនួញ ឬការបំពេញ​សកម្មភាព​ការងារ​ណាមួយនោះទេ។

៨.២. ធនាគារ នឹងមិនតំណាង ឬធានាថា App និង/ឬ សេវាកម្ម​របស់អ្នក​នៅតែទទួលបាន ឬអាចចូល​ប្រើប្រាស់​បាននោះទេ។

៨.៣. ធនាគារ​មិនទទួលខុសត្រូវ​ចំពោះ​ឧប្បតិ្តហេតុ​ដែលបាន​កើតឡើង​ដោយប្រយោល ឬមានការខូចខាត (ដោយរួមបញ្ចូល និងមិនកំណត់ ចំពោះការខាតបង់ប្រាក់ចំណេញ ប្រាក់ចំណូល  ឬការប្រើប្រាស់ផ្សេងទៀត) ឬទទួលខុសត្រូវ​លើសំណង​ការខូចខាត ឬការខូចទម្រង់ ដែលបានកើតឡើង​ដែលមិនជាប់​ទាក់ទង​ចំពោះ​លក្ខខណ្ឌនេះ​នោះទេ។ ធនាគារ​នឹងមិនទទួលខុសត្រូវ​លើការចូលប្រើប្រាស់​ដោយ​មិនមាន​ការអនុញ្ញាត ការផ្លាស់ប្ដូរ ការលួចយក ឬការបំផ្លាញចោល App និង/ឬ សេវាកម្មដោយសារ​ឧបត្តិហេតុ កំហុស​នៃការប្រើប្រាស់ ឬការក្លែងបន្លំ​ដែលកើត​ដោយសារតែ​កំហុស​របស់អ្នក ឬតតិយជន ឬដោយសារ​ការពន្យារ ឬដោយសារ​កំហុស​ណាមួយដែលមិនស្ថិតនៅក្រោម​ការទទួលខុសត្រូវ​របស់យើង។

៩. កម្មសិទ្ធិបញ្ញា

៩.១. រាល់សិទ្ធិលើកម្មសិទ្ធិបញ្ញា ឬដែលកើតមាន​ដោយមាន​ការទាក់ទង​ជាមួយ App ជាកម្មសិទ្ធិ​របស់ធនាគារ។

១០. គោលការណ៍ឯកជនភាព

១០.១. ព័ត៌មានផ្ទាល់ខ្លួន

• អ្នកបានយល់ព្រម និងអនុញ្ញាតឲ្យ​ធនាគារ​អាចធ្វើការផ្ទៀងផ្ទាត់ នូវព័ត៌មានរបស់អ្នក​ជាមួយ​ព័ត៌មាន​ដែលធនាគារ​មានដោយរួមបញ្ចូល​ទាំង លេខទូរស័ព្ទ ឈ្មោះ ថ្ងៃខែឆ្នាំកំណើត លេខឯកសារ​បញ្ជាក់​អត្តសញ្ញាណ និងព័ត៌មានផ្សេងទៀង​ដែលធនាគារ​អាចសម្គាល់​អ្នកបាន និងស្របតាមច្បាប់ និង​បទប្បញ្ញាតិ​ទាក់ទង់​នឹងការស្គាល់​អតិថិជន (KYC) ទាំងអស់នេះ​តទៅហៅថា៖ (“ព័ត៌មានផ្ទាល់ខ្លួន”)។
• អ្នកបានទទួលស្គាល់ថា ធនាគារ​ត្រូវការនូវ​ព័ត៌មាន​ផ្ទាល់ខ្លួន​របស់អ្នកដើម្បី​ដឹងពី​តម្រូវការ​របស់អ្នក និង​ផ្ដល់ជូននូវ​សេវាកម្ម​ដែលល្អប្រសើរ​ជូនអ្នក។
• ព័ត៌មាន​ផ្ទាល់ខ្លួន​របស់អ្នក​ដែលបានផ្ដល់ជូន​ធនាគារ​តាមរយៈ App គឺនឹងត្រូវ​ប្រើប្រាស់​ក្នុងគោលបំណង​ដែលបានកំណត់​ដោយជាក់លាក់​នៅក្នុង​គោលការណ៍​ឯកជនភាព និង​ក្នុងមូលហេតុ​ខាងក្រោមនេះ
  • ការគ្រប់គ្រង App
  • ឲ្យអ្នកចូលប្រើប្រាស់ (log-in)
  • ឲ្យអ្នកចូលប្រើប្រាស់​សេវាកម្ម​ដែលមាន​នៅក្នុង​ទម្រង់​អេឡិចត្រូនិច​ដូចជា ស្នើសុំកម្ចី ពិនិត្យមើលលទ្ធភាព​ដែលអាច​កម្ចីបាន និងពិនិត្យមើល​តារាងសងប្រាក់​ត្រលប់របស់អ្នក។
  • ដើម្បីអនុលោម​តាមបទបញ្ជាផ្ទៃក្នុង​របស់​ធនាគារ និង​បទប្បញ្ញតិ​ជាធរមាន​របស់ព្រះរាជាណាចក្រកម្ពុជា និង
  • លើកកម្ពស់ផលិតផល និងសេវាកម្មរបស់យើង។

១០.២. ការបើកបង្ហាញព័ត៌មាន

• អ្នកមិនអាចប្រកែក និងដោយគ្មានលក្ខខណ្ឌ ក្នុងការព្រមព្រៀងឲ្យ​ធនាគារ និងបុគ្គលិក​របស់ធនាគារ ផ្តល់នូវព័ត៌មាន​ផ្ទាល់ខ្លួន​ណាមួយ​ដែលទាក់ទង​ជាមួយអ្នក ឬព័ត៌មាន​ណាមួយ​ផ្សេងទៀត​របស់អ្នក ដែលធនាគារ​ចាត់ទុកថា​ចាំបាច់ ទៅឲ្យ​បុគ្គលណាមួយ​ដែលមាន​សមត្ថកិច្ច ឬតម្រូវ​ដោយអាជ្ញាធរ ឬដោយច្បាប់ ឬទៅបុគ្គលណាមួយ​ផ្សេងទៀត​ដែលសមស្រប​នឹង​គោលបំណង​ជាក់លាក់​ណាមួយ ហើយអ្នកក៏​យល់ព្រម​ផងដែរថា ធនាគារ និងបុគ្គលិក​របស់ធនាគារ ផ្តល់ព័ត៌មាន​ជាបន្តបន្ទាប់ ដើម្បី​បំពេញទៅតាម​ការតម្រូវ​របស់វិធានច្បាប់ ឬបទបញ្ញត្តិណាមួយ។

១១. ការកែប្រែលក្ខខណ្ឌនេះ

១១.១. យើងអាច នឹងធ្វើការកែប្រែលក្ខខណ្ឌនេះ ពីពេលមួយទៅពេលមួយដើម្បី៖

• ឆ្លើយតបទៅនឹង​ការផ្លាស់ប្ដូរនៃច្បាប់ ការទាមទារ​របស់​បទប្បញ្ញតិ​ដែលពាក់ព័ន្ធ​ទៅនឹង​ការណែនាំ​របស់វិស័យ​ធនាគារ ឬ សេចក្ដីសម្រេច​របស់តុលាការ ឬស្ថាប័នដែលមានសម្ថកិច្ច។
• ធ្វើឲ្យមានភាពច្បាស់លាស់ និងងាយស្រួលយល់ ឬ
• បន្ថែមអត្ថប្រយោជន៍ និងមិនបណ្តាលឲ្យ​មានការប៉ះពាល់ដល់អ្នក
• ការផ្លាស់ប្ដូរសេវាកម្មរបស់យើង ការណែនាំនូវសេវាកម្មថ្មី ឬការដកចេញនូវសេវាកម្មណាមួយ​ដែលលែងមាន​ប្រើប្រាស់ និង
• ការកែប្រែ​នូវសេវាកម្ម​ដែលមានស្រាប់ ដោយសារ​ការផ្លាស់ប្ដូរ​នៃបច្ចេកវិទ្យា ប្រព័ន្ធ ដំណើរការ ឬគោលការណ៍ ឬនីតិវិធីនៃ​អាជីវកម្ម​របស់យើង។

១១.២. ការកែប្រែទាំងនោះ នឹងមានសុពលភាព​ក្នុងរយៈពេល ៣០ (សាមសិបថ្ងៃ) ចាប់ពី​ថ្ងៃជូនដំណឹង​ទៅអ្នក​អំពីការកែប្រែ​នោះ​តាមរយៈ App របស់យើង លើកលែងតែ​មានកាលៈទេសៈ​ដែលតម្រូវឲ្យ​ជូនដំណឹង​រយៈពេលខ្លី​ជាងនេះ។

១១.៣. ការព្រមព្រៀង​របស់អ្នក​ចំពោះការកែប្រែ​ណាមួយ​នៃលក្ខខណ្ឌ​ទាំងនេះ ដែលមិនសំដៅ​លើប្រការ ១០.១ នឹងបញ្ជាក់​ពីការយល់ព្រម​តាមរយៈ App ឬការព្រមព្រៀងនៅពេល​បង្កើតកិច្ចព្រមព្រៀង​កម្ចីថ្មី។

១១.៤. ប្រសិនបើ​អ្នកមិនយល់ព្រម ចំពោះ​ការកែប្រែណាមួយ​ដែលយើងនឹង​ធ្វើការផ្លាស់ប្ដូរ អ្នកអាចបិទ​គណនី​របស់អ្នក​ដោយធ្វើការទាក់ទង់មក​យើងតាមរយៈ​សារអេឡិចត្រូនិច ឬតាមទូរស័ព្ទ ដែលមាន​នៅក្នុង​គេហទំព័រ​របស់ធនាគារយើងខ្ញុំ។ ការបន្តប្រើប្រាស់ App បន្ទាប់ពី​មានការកែប្រែ​លក្ខខណ្ឌនេះ មានន័យថា​អ្នកបានយល់ព្រម ហើយចងកាតព្វកិច្ច​ទៅតាមការផ្លាស់ប្ដូរ​នៃលក្ខខណ្ឌនេះ។

១២. បញ្ញត្តិចុងក្រោយ

១២.១. លក្ខខណ្ឌនេះ​ត្រូវស្ថិតនៅក្រោម និងត្រូវបកស្រាយ​ដោយច្បាប់នៃព្រះរាជាណាចក្រកម្ពុជា។ ប្រសិនបើ​មានបញ្ញត្តិ​ណាមួយ ឬផ្នែកនៃ​បញ្ញតិ្ត​ណាមួយ នៃលក្ខខណ្ឌនេះ គឺ ឬក្លាយជាអសុពលភាព ខុសច្បាប់ ឬមិនអាចអនុវត្តបាន នោះត្រូវធ្វើការកែប្រែ​នូវកម្រិតអប្បបរមា​ដែលចាំបាច់​ដើម្បីធ្វើឲ្យ​វាមានសុពលភាព និងអនុវត្តបាន។ ប្រសិនបើ​ការកែប្រែនោះ​មិនអាចធ្វើទៅបាន នោះបញ្ញតិ្ត​ដែលពាក់ព័ន្ធ ឬផ្នែកណាមួយនៃ​បញ្ញតិ្តនោះ​ត្រូវលុបចោល។ ការកែប្រែ ឬលុបចោលនៃបញ្ញត្តិ ឬផ្នែកណាមួយ​នៃបញ្ញតិ្ត​នៅក្នុង​ប្រការនេះ​មិនប៉ះពាល់​ដល់សុពលភាព និងការអនុវត្ត​បាននៃបញ្ញតិ្ត​ផ្សេងទៀត​ដែលនៅសល់​នៃលក្ខខណ្ឌនេះ នោះទេ។

១២.២. អ្នកយល់ព្រមថា យើងមានសិទ្ធិ​ផ្ទេរនូវសិទ្ធិ​របស់យើង និងកាតព្វកិច្ចដែលមាននៅក្នុង​លក្ខខណ្ឌនេះ ទៅភាគីទីបីផ្សេងទៀត​ដោយមិនចាំបាច់​ជូនដំណឹង​ជាមុនឡើយ។

១២.៣. សិទ្ធិ និង កាតព្វកិច្ច​របស់អ្នក​នៅក្នុង​លក្ខខណ្ឌ នេះ ជាការទទួលខុសត្រូវ​របស់អ្នក​ដោយផ្ទាល់ ដែលមានន័យថា​អ្នកមិនអាច​ផ្ទេរទៅភាគីណាមួយ​ផ្សេង​ដោយមិនមាន​ការយល់ព្រម​ជាលាយលក្ខណ៍អក្សរ​ដោយជាក់លាក់​ពីយើងជាមុននោះទេ។

១៣. បណ្ដឹង

១៣.១. យើងចាត់ទុកថាជាបណ្ដឹង នៅពេលមានការបង្ហាញនូវ​ការមិនពេញចិត្ត​របស់អ្នក ចំពោះសេវាកម្ម​របស់យើង។ នៅពេលដែល​អ្នកដាក់បណ្តឹង នោះយើង នឹងព្យាយាមដោះស្រាយ និងកែតម្រូវបញ្ហា​នោះយ៉ាងឆាប់រហ័ស​បំផុតតាម​ដែលអាចធ្វើទៅបាន។

១៣.២. ប្រសិនបើ​អ្នកគិតថា​បណ្ដឹងរបស់អ្នក​មិនត្រូវបានដោះស្រាយ តាមការចង់បានរបស់អ្នក យើងសូមលើកទឹកចិត្ត​ឲ្យអ្នកទំនាក់ទំនងមកលេខ៖ ០២៣/០៧០/០៧៨ ៩៨៨ ៥៥៥ ឬតាមរយៈតំណភ្ជាប់នេះ www.aeon.com.kh ឬសូមមកដោយផ្ទាល់នៅតាមសាខាណាមួយ​របស់យើង​ដែលនៅជិតលោកអ្នក​បំផុត​ដើម្បី​ដាក់បណ្ដឹង។